نعتذر

أستيقظ مدير بلدة (طمبور لاند) ,,منتول الرابع
عشر ,, و هو يشعر بتعنفص حاد بالدورة الدموية و شعر انه مشتاق جدا لدورة
المياه لاسباب تتعلق بالجهاز الهضمي نتيجة وجبة ثريد سابقة ,, بعد داونلود
سريع استدعى تناوله حباية مال اسهال ,, كمش فردتي شحاطته و ضرب بهما واحد
بالاخرى ,, فحضر سكرتيره و قال له ,,

- امرك
استاذ منتول الدرزن
- لك
بابا الرابع عشر ,,, الرابع عشر نعلى على خشمك جنة ماوس ميركوري ,, درزن
هذا جدي و اني تفيده
- نعم ؟
- قصدي
حفيدة ,, شنو اخر اخبار الشعب الطمبوري ؟
- نفس
المشكلة حضرة منتول المدير ,, مشاكل الطلاق وصلت مرحلة مخيفة ,, دا انفكر
انوكف استيراد الخدامات من الفلبين و نستورد بدالهم قضاة شرعيين لان مدا
انلحك ,, اتصور اليوم واحد طلّك وحدة
- و
شوكت اتزوجو ؟
- اصلا
ما اتزوجو !!! ,,
- لالا
لازم نلكة حل باسرع وكت ,, و هسة امشي اطلع برة لان اريد افوت للحمام ,,
شكلي غلطت اخذت بدال حباية الاسهال فاليوم لان ماكو تحسن اشو ,, و اصدر امر
عاقب الطباخ ,, شفرو كل قنوات الرسيفر مالته و بس بقو قناة السودان ,, يلا
جر ويلك

بعد
عدة ايام ,, قررت بلدية (طمبور لاند) استيراد جهاز من اليابان ,, يقف كدامة
الشاب ,, اي شاب عسا لو جان بتيتة شاب ..,, اي شي مكتوب بهويتة ذكر ,,, و
يطبع عال كيبورد مواصفات البنية و الجهاز يحدد له اسمها و مكانها و كلشي
عنها ,, فحدث ازدحام شديد عبالك واحد ديبيع بانزين ببلاش و ويا فلتر دهن
هدية ,, هذا زبال اجة طبع كال اريد بنية محيط ريحتها ما يتجاوز 18 متر ,, و
الجهاز طلعلة زبّالة بت حلال راح عقد عليها والمهر جان جيس مليان كشور
نارنج و 2 دوارة شهدو عال عقد , شهر العسل راح يكضو بخرابة 5 نجوم بضواحي
طمبور لاند ,, هذا رجال شايب جاي بعكازة عمره 88 سنة جيوبة متروسة تينورمين
و اسفيجيك و بانادول و شايل صيدلية لخ بجيب بنطرونة الورة يريد يتزوج ,,
الجهاز راد يعفطلة لكن سوة سيرج و ورة ساعتين يلا لكالة وحدة عانس ما
متزوجة و صارلها 63 سنة طالعة تقاعد ,,, الشايب فرح و و طلعلة سن العقل مرة
لخ من الفرحة لكن خطية ما ان اندار ليروح يخطبها حتى صدرت من الجهاز صوت
تحذير يقول ,, ماتت ماتت ماتت ماتت ماتت ماتت ماتت طيط طيط
طييييييييييييييط
اجه
فقير متسول كتب عال جهاز يستر عليك و على المذر بورد مالتك رحمالله امك و
وايراتك فد مرة حتى لو بلا مريء هم قابل حتى لو اي شي ,, الجهاز طلعلة
الفتاة الوحيدة بمستشفى طمبور لاند للامرض العقلية و الخبالية,, في ال نص
ستاو ديبارتمنت ,, و عقد عليها و منتظرين اتصير شغلتين حتى ينزفون , لو هية
تعقل لو هو من وراها يتخبل ,,


و هكذا
لم يبقى في البلدة غير شاب يعمل موديل كروش , يوكف هيج و المعلمة اتجيب
اطفال الروضة ايباوعون على كرشة و اتكللهم هذا مصير اللي ما يشرب حليب
الصبح , و يدعى محشش مكرش ,, قرر هو الأخر ان يجرب حظه و يتزوج ,,

دخل
محشش مكرش الى الجهاز و هو يقول
-
سبحان الله هذا الاتاري راح يجيبلي مرة ؟ اشتعل عمو ابليسكم يال جابانييز
مد يده
و اخذ يكتب ,,


" اريد
وحدة نخلاء القامة 5 طوابق الهامة ,, كصيفة العلباة مشنوقة القوام ,,
الشعر اصفر عبالك ضارب دقلة بشيشة مال عمبة ,, و الحواجب قواسات قزح صغار
فوك عيونها اللي اريدها جبيرة بحيث البؤبؤ يبين بكد الدكمة مال بالطو
بيبيتي ,بلا زحمة اريدها بلية قزحية ليش ما ادري بس ما اريد قزحية ,و
اريدها بلية مصران اعور حتى لا اتشيلة و تعال زخ فلوس , ركبتها عريضة ,, و
حنجها صغير و بنبوني ما اريد وحدة حنجها كرك متر و شوية تجي تحضني ينكص
راسي ,, رشيقة التقاطيع بحيث اللي يشوفها يكول هاي مسويها بالثري دي ماكس
2010 ,,

اريدها
حنونة
اريدها
عطوفة
اريدها
تعرف تطبخ اي شي و اصعب شي حتى الشوربة ,, مو تحرك الباميا و ثاني يوم
البلدة نصها كسوف من الدخان
اريد
لسانها مثل موظف ,, يشتغل 6 ساعات بس باليوم
اريدها
اتسويلي البيت جنة ,, من للبيت ارجع اكول ماشالله ,,, و ما اتخليني فد يوم
ارجع اصيح اعوذ بالله,, ثكلتكي بت خالتج فد مرة
اريدها
من تمرض تراعيني ,, مو اني حرارتي 45 و وياها 5 قرار و الخاتون اتكلي لو
اتوديني لبيت اهلي العب بلاي وية اختي لو تروح اتوديني اشتري هدوم حتى املي
ال شبر المكعب اللي باقي فارغ بالكنتور لو تروح اتجيبلي كيلو تعروزي اكرط
بي
اريدها
تضحك دائما ,, نياااهاهاهاهاها حتى لو مثل العبيطة بس المهم مو تكلب وجها و
اتعقجة يصير جنة بنطرون مال بالات ,,
اريدها
صادقة ,,, اريدها قنوعة ,, و مطيعة ,, اجيبلها لفة فلافل و اكلها شنو رايج
بالكباب ؟ اتكلي طيب و احلى شي بي انه مدور مو طويل لازم الواحد ايغير ,,

بعد
هذا ,,, اخذ محشش مكرش ينتظر الجهاز وهو يقوم بعمل مسح شامل بانتظار ان
تظهر صورة و معلومات عن الفتاة

طبقا
للاوصاف ظهرت صورة لفتاة حسناء ,, جعلت محشش يضرب ايده على كصته بصوت عالي
جعلت صافرات الانذار بالبلدة اتدك عبالهم طيارة وكعت ,, و اخذ خشمه يحاول
الافلات من وجه و يحلق عاليا من فرط التأثر ,,, و لكن الخير ما يكمل

فعند
شاشة نتائج المواصفات ظهرت هذه العبارة

نعتذر
,, ,, فهذه الفتاة لم تولد بعد !!!