]
تره المكتوب يسمر موبدينه
وعليكم دمع صافي موبدينه
تكول احنه انتهينه موبدينه
ونهايتنه غفل صارت سويه
**
ذهب كالو عليك شلون فضه
وكلبك يالحلو وياي فضه
حجي العذال لا تطريه فضه
وعوف الكال والكالو عليه
**
بهوه المحبوب قص قصتي يراوي
الزمان شكثر للعاشك يراوي
احبك ياحلو يشكر يراوي
ملكت الروح والمهجه سويه
**
علي كالو شمالك بستغني
من الموال بسك بسته غني
كافي بعد اسكت بس تغني
انه انجنيت مايدرون بيه
**
حملت انه لجل عينج مهانه
شعجب حجيك الي تحسبه مهانه
نسيتيني ولج وسفه مها انه
ونسيتي الليل النسهره سويه
**
تعال احسب همومي وانته عدهه
ماتخلف وعيدك وانته عدهه
تبجي عليك روحي وانته عدهه
شحال تفاركك روحي خطيه
**
حبيبي صار هجرك هم علينه
وصفه همك وهمنه هم علينه
بحبك ما وطينه هم علينه
وعلت هاماتنه بعلو الثريه
**
روحي من الصبر ملت وملهه
الجيتك تنتضر ظلت وملهه
الك مرقص بنص كلبي وملهه
والك حاتات يتكلبن بيه