صدك تضحك يخايب واني حزنان
و كلمات الفرح بالسانك ادور
وصدك ناسي اليحبك صارله اسنين
ولا مر اعله بالك خـــــــايب امرور
وصدك بعت المحبه ابرخص التراب
وضفت هم اعله همي وصرت مغدور
وصدك دمعك تعزه اعليه بالضيج
وانه السويت دمعي ابضيجك ابحور
وصدك تيزاب دربـي اترشه واشواك
وانه الرشيت دربك طيبه وزهـــــور
وصدك تحچي ابقساوه اوياي وصياح
وانه الوياك احچي ابصوت عصفور
وصدك وياي طبعك طبع الاذياب
وانه الوياك طبعي طبع الطيور
وصدك تتركني أنته اوجنحك اطويل
وانه الشلتك ابظهري اوجنحي مكسور
وصدك مايك تمنعه واني عطشان
وانه السويت ألك چفيني ناعور
وصدك تمنع خبزتك واني جوعان
وانه كل العمر جبته الك تنور
وصدك وحدي اتركتني ابلايه حراس
وانه عمري كضيته اعليك ناطور
معــــــــــــذور اليخون اوينسه كل طيب
وانسانــــــــــــــــــــي اكلك وانته معذور
موضوع: صدك تضحك يخايب واني حزنان 
الأحد نوفمبر 07, 2010 3:41 am
